Euskal kantak nazioartean

Euskal kantak, euskara bera bezala, gure kulturari lotuta daude, eta hedapen txikia dutela iruditzen zaigu... Seguru? Nazioatera ere iritsi dira ba, hainbat euskal kanta Biper Kombo taldeari esker!

Guk euskaraz, zuk zergatik ez? saltsa bertsioan entzun dezakegu...



Iturengo arotza berriz, Bollywood-eko eran!



Iparraldeko Biper Kombo taldeak moldatutakoak dira bertsio hauek guztiak, eta badirudi serio hartu dutela lana, dagoeneko album bat baino gehiago baitute. Spotify bidez ere entzun daitezke abesti hauek. Argibide gehiago nahi izanez gero, sartu sustatu.com-en.

Dantzaldia gaur Elgetan

Dantzaldia izango da gaur Elgetan, Espaloia Kafe Antzokian. Hileko azken igandeetan gidatutako dantzaldia antolatzen dute, eta Euskal Herriko eta Europako dantza tradizionalekin gozateko doako aukera hau eskaintzen dute. Edozeinek har dezake parte bertan, gozatzeko prest badago!

Batzuetan taldean edota beste batzuetan bikoteka dantzatzeko saioa da. Parte hartzaileen maila kontuan hartzen dute antolatzaileek dantzak aukeratzeko orduan: kalejirak, korruan dantzatzekoak, bikoteka dantzatzekoak... Eta behar izanez gero, gidari bat izango da dantzan laguntzeko.

Hileko azken igande guztietan bezala, gaur dantzaldia 19:00etan hasiko da, eta 20:30ak arte izango da gorputzak mugitzeko aukera

Euskarari autopsia zorrotza egin dio Koldo Izagirrek

Koldo Izagirre idazleak euskararen egoeraren inguruko saiakera bat argitaratu berri du: Autopsiarako frogak. Zorrotz kritikatu ditu euskararen inguruan lanean dabiltzala dioten hainbat politika eta erakunde, eta ez dira edonolako iritziak izan bereak. Interes izugarria piztu du Izagirreren saiakera honek irakurleen artean, 15 egunetan amaitu baita argitalpen honen lehen edizioa.

Autopsiarako frogak, Koldo Izagirreren azken liburua.

Asko dira autopsia hori egiteko erabili dituen frogak. "Euskararen menderazioa teorizatua, adostua eta planifikatua" dela dio Izagirrek, eta arrazoi bat baino gehiago azaltzen ditu. Ondorengo hauexek, beste baztuen artean.

Euskararen inguruan mezu toxiko asko zabaldu direla uste du idazleak. "Euskara inposatu beharrean erdal hiztuna euskarara erakarri behar dela esatea" da Izagirreren aburuz mezu toxiko horietako bat: "erdarak legea du alde, eta berez erakargarria dela onartzen da".

Etxepare Institutua ere ez da garbi ateratzen euskararen erahilketa honen errudunak bilatzeko autopsian. "Euskara mundiala" kanpaina txatxukeriatzat dauka Koldo Izagirrek.

Eskubideak berriz, ez dira denontzat berdinak demokrazia honetan. "Hizkuntzak berak ez daukala eskubiderik esaten digute", azaltzen du idazleak, "eskuideak gizakionak direla. Baina euskalduna den gizakia muga bateraino da gizaki eskubideduna, handik aurrera ez".

Autopsia honetan zehar artseniko arrasto bat aurkitu du Izagirrek: elebitasuna. Bere aburuz, "elebitasun ofizialak inbaditu egin ditu euskararen eremu autonomo murritz eta txiki guztiak beste lehen ele horrekin". Eta ondorioz, "zer produzitzen dute erakundeak euskaran? Ezer ez".



Artsenikoa ez da autopsian agertutako froga bakarra, ordea. Agia aldizkarian idazten duen Gorka Bereziartua kazetariak tabakoaren keak eragindako minbizia ere aurkitu du euskal kulturaren biriketan. Boligrafo Gorria blogean idatzi du Tabakalerak jasandako diru laguntza murrizketaz. Euskal kulturaren alorrean lan txikiagoa egiten dutenek jasandako murrizketek ordea, ohiartzuna ere eskasa izan dute, baina nori axola dio?

Eguraldi txarrak kaosa sortu du Europako aireportuetan

Hainbat hegaldi bertan behera gelditu dira Europa osoko aireportuetan asteburu honetan izan den eguraldi txarraren eta hotzaren ondorioz. Nahasmen handiena Londresen bizi izan da, Heathrow-eko aireportuan batez ere, baina baita Gatwick, Stansted eta Luton-ekoetan ere.

Heathrow-ekoa da hain zuzen, hegaldi gehien izaten dituen aireportua Europan, eta beste aireportuetarako konexio gehienak ere bertan egiten dira. Gauzak horrela, kaosa handia da, eta datozen egunetan trafikoa normaltasunera itzultzeko zailtasunak izango direla abisatu dute jada.

Gurean berriz, hamar hegaldi bertan behera utzi dituzte Loiuko aireportuan, eta ehundik gora Estatuko gainerakoetan, AENAk jakinarazi duenez. Bilbon, Alemaniarako sei hegaldi, Frantziarako bi eta Erresuma Baturako beste bi izan dira bertan behera gelditu diren hegaldiak. Hondarribiako, Forondako eta Noaineko aireportuetan berriz, normaltasuna da nagusi.

Estatuko aireportuek berriz, Erresuma Baturako 85 hegaldi, Frantziarako 55, Alemaniarako 24 eta Italiarako 4 utzi dituzte bertan behera.

Meteorologian adituek diotenez, tenperatura hotzak hilabete gehiago iraun dezake, batez ere, Eskozian, Ipar Irlandan, Galesen eta Ingalaterran, eta Heathrow-eko aireportuko web orri ofizialean adierazi dute asteazkenera arte (hilak 22), hiru hegalditatik bat izango dela aireratzeko moduan. Gaineratu dute, hurrengo egunetan ere, atzerapen eta bertan behera geratze gehiago egon daitezkeela.

Korrontzi eta Oinkari, herri musika garaikidea

Korrontzi folk musika talde bizkaitarrak eta Oinkari dantza talde gipuzkoarrak erakutsi nahi digute euskal musika herrikoiak ez duela zertan zaharra izan behar."Herri musika eta dantza tradizionala berritzeko grinak batzen" dituela diote, eta "iraganari etorkizunerantz joateko begiratzen" diotela.

Kepa Junkera trikitilariak eta Oskorri folk musika taldeak egindako lana dute oinarri Korrontzi taldekoek, baina dinamismo eta sormen ukitu handiagoarekin egiten dute lan. Oinkari dantza taldea berriz, ez dago tradizioari horren lotuta, eta musika garaikideagoa erabiltzen saiatzen da.

Hil honen 3an bi taldeek azken hilabeteetan eskaini duten ikuskizuna biltzen duen lana plazaratu zen: Infernuko hauspoa. Baina oraindik ere bada bi taldeen emanaldiaz gozatzeko aukera. Igande honetan adibidez, Ondarroako Kafe Antzokian izango dira.

•  Kontzertuaren inguruko informazio gehiago: Bi lurralderen artean blogean. 

Sehaska ikusteko azken aukera

Larunbat honetan, hilak 18, Kresala dantza taldeak azkeneko aldiz eskainiko du Sehaska ikuskizuna, Donostiako Antzoki Zaharrean, iluntzeko 20:00etan. Emanaldi honekin amaituko da 2006an estreinatutako balet honen banaketa-eskaintza.

 Lau denboralditan zehar izan da dantza talde honen eskaintzaz gozatzeko aukera, bai Euskal Herrian eta baita Europako Nazioarteko dantza jaialdi nagusietan ere; hala nola, Holandan, Finlandian, Suitzan, Frantzian eta Belgradon.

 
Sehaska ikuskizunean 30 dantzarik eta 7 musikarik hartzen dute parte. Dantza antzeztua ikuskizun bat da, eta sinopsiak hala dio: "edukitzearen atsegina eta ez izatearen estutasuna lotzetik sortutako bi ildoetatik garatzen dira koreografia anitzak". Amaia Zubiriak eta Maddi Oyhenartek jarritako ahotsarekin, eta Tere Irastortzaren eta Bitoriono Gandiagaren poema batzuekin gozatzeko aukera ere badago emanaldian.

Nazioarteko bertsolaritza Euskal Herrian

Ezaugarri bera dute Kubako repentistek, Uruguaiko payadoreek eta Euskal Herriko bertsolariek: inprobisazioan aritzen direla, alegia.

Atzo hasi eta abenduaren 5era bitartean Gasteizen egiten ari den Kongresu bat dela eta, batbatekotasunean aritzen diren hauek hainbat erakustaldi egingo dituzte. Elkarrekin nola uztartzen eta elkar nola ulertzen diren, beren arteko komunikazioa nolakoa izan daitekeen eta elkar adarra nola jotzen dioten ere azalduko dute. Jolastu eta ondo pasatzeaz gain, elkarrengandik ikasteko aukera paregabea da hau, dudarik gabe.

Ondorengoak dira gurera etorri direnak: Uruguaiko Mariela Acevedo eta Gabriel Luceno payadoreak eta kubako Alexis Díaz Pimienta repentista. Bi musikari ere izango dira, Angel Luis Aguiar (lauda) eta Rubén Aguilar (kitarra). Bertsolariak berriz, tokian tokikoak izango dira.

Emanaldiak Gasteizen, Gernikan, Bilbon, Iruñean, Donostianeta Durangon izango dira aste honetan zehar. Egitarau oso ikusteko, sartu Bizkaie!-ren edo Bertsozaleen Elkartearen web orrian.

¡Si yo hablo siempre en euskera!

Gertu dago Euskararen Eguna, eta horren harira, Donostiako Euskararen Udal Patronatuak hainbat ekimen jarri ditu martxan gazteen artean ere euskararen erabilera bultzatzeko.

Izan ere, 2006an EUSTATek egindako azterketa baten arabera, Donostian, 24 urtetik beherako gazteen %90 euskaraz ulertu eta hitz egiteko gai da, baina ez dute erabiltzen.

Horri irtenbidea bilatzeko, Zurriolako Antzerki Eskolako kideek hainbat sketch grabatu dituzte, Nik ere euskaraz ekimenaren barruan. Dudarik gabe, bigarren bideoa da esanguratsuena!

Gipuzkoar Erako Aurresku Txapelketa larunbatean

Bihar XXX. Gipuzkoar Erako Aurresku Txapelketa ospatuko da Pasai Donibanen, Pasaiako Udalak, Gipuzkoako Euskal Dantzarien Biltzarrak (EDB) eta Alkarkide Alkartasunako Dantzari Ohiak taldeak antolaturik. Lehiaketa arratsaldeko 19:00etan hasiko da, kirolgeian.

Zortzi parte-hartzaile izango dira bertan, horien artean, faboritoa eta lehengo urteko irabazle Iker Larunbe atarrabiarra. Gainontzekoak gipuzkoarrak dira: Ander Diez (Lezo), Unai Etxebeste (Baliarrain), Iker Sanz (Lezo), Aritz Iglesias (Tolosa), Aitor Arrieta (Errenteria), Beñat Asensio (lezo) eta Juan Urretabizkaia (Tolosa).

Datzari bakoitzak, sokadantzaren bost zati dantzatu beharko ditu: Soinu Zaharra (Puntamotz), hirunaka dantzatu beharrekoa; eskua aldatzeko soinua (Alpargata), banaka; Kontrapasa (Agurra), neskari eskainitako dantza; aurkez aurke (Desafioa), bi dantzari aurrez aurre aritzekoa; eta Zortzikoa, interpretazio librea egitekoa.

Informazio gehiago:

• dantzan.com

Garikoitz Mendizabal eta Aitor Furundarenaren disko berria kalean da

Garikoitz Mendizabal txistulariak eta Aitor Furundarena akordeoi-joleak Arnasak disko berria kaleratu dute. Diskoa "bien arteko harreman onaren ondorioz" sortutako lana dela diote bi musikariek. Zuzeneko kontzertu batzuk egin eta grabatu dituzte, "lokal txikietan, jendea gertu sentitzen zuten lekuetan", eta "oso esperientzia politza" izan dela azpimarratu dute.



Diskoa osatzen duten kantu gehienak beste artista eta konpositore batzuen obrak dira, nahiz eta abesti pare bat beraiek egindako moldaketak diren.

Lan honetarako giltza "elkarri entzutea" dela uste dute. "Ez txistuak ez akordeoiak ez dute hartzen besteak baino protagonismo handiagorik. Bien arteko kimika berezia sortu da eta lan polita atera da". "Partituretara gehiegi lotu gabe" jotzen dutela ere aipatu dute, "kantuei bizia ematen saiatzen" direla.

Grabazioan orain areko zuzenekoak bildu badituzte ere, kontzertu gehiago sortzea ez dute baztertzen.

Gazteak eta elikadura podcasta

Hementxe TILA taldearen azken lana! Oraingoan, istorio bat kontatu dugu audioaren bitartez, berriro ere, Gazteak eta elikadura gaiaan oinarrituta. Jessy da gure protagonista. Orain gutxi hasi da etxetik kanpo bere kabuz bizitzen, eta ez da guztiz moldatzen. Lana dela, asteburuetan parranda egin nahi duela, sukaldean aritzea ez zaiola gustatzen... ez du elikadura batere zaintzen. Baina pixkanaka, osasunak duen garrantziaz ohartuko da, eta sukaldean moldatzen  hasi beharko duela ulertuko du...

Euskal Herrian ere lipdub!

Badakit dagoeneko denek entzun duzuela zer edo zer lipdub-ei buruz. Ziur, asko nazka-nazka egina ere badagoela bideo musikal mota berria hauekin... Baina kontua hasi besterik ez da egin!

Dirudienez, Quebec-eko Unibertsitateko komunikazio ikasleek egin zuten lehenetariko lipdub arrakastatsua duela urtebete.





















Honek lortutako ospea mundu guztira zabaldu da. Joseina Etxeberriaren belarri zuloetara ere iritsi ziren bibrazio onak, eta Euskadi Gazteak lipdub lehiaketa antolatu du. Hasieran bideo gutxi bidali baziren ere, azkenerako jende asko animatu da, eta lehiaketa puri purian dago orain. Abenduaren 1ean jakinaraziko da zein den bideo irabazlea. Noski, aurrez, denon botoak behar dira!

Baina horrez gain, bada gure artean zeresan handia eman duen bese lipdub bat. Parte-hartze handia dela eta, errekorra lortu du gainera. Katalunian egin den lipdub-az ari naiz, noski.

Hau ikusita, inbidia sanoak jota geratu da bat baino gehiago... eta bai! Oraingoan ere, euskaldunak atzetik, kopiak egiten! Baina ez edonolako kopiak! Euskadi Gazteak antolatutako lipdub lehiaketan bada atzerriko formatu hau gurera moldatzeko abilezia izan duenik (ez dut izenik esango, ea gero botoak ematerako orduan eragina izan dudala leporatzen didaten!).

Orain, azken txanpa geratzen zaigu. Euskal Herriaren independentziaren aldeko lipdub jendetsu bat antolatzea! Euskalherrian.info ari da dagoeneko lanean. Durangoko Azoka aprobetxatuz, Durangon bertan abenduaren 6an grapatuko da lipdub hau. Ideiak eta proposamenak ez dira falta. Jendea animatzea besterik ez da behar!

Oraingoz, Kortaturen Sarri sarri kantua erabiltzeko asmoa dagoela dirudi, eta charleston edo jump-style dantzatzeko estiloak proposatu dira... Hasi buruari buelta batzuk ematen eta gorputza tenorean jartzen! Iritsi da mugitzeko unea!

Zorionak musikari!

Gaur, azaroaren 22a, musikari guztiak zoriontzeko eguna dugu, Santa Zezilia eguna, hain zuzen ere. Kondairaren arabera, Zezilia V. mendean bizi izan zen erromatarra zen, kristautasunera bihurtu zena. Bere senarra, anaia, eta beste hainbat kristautasunera bihurtzeko ahalegina ere egin zuen, eta ondorioz, hiltzera kondenatua izan zen. Baina badirudi, behin baino gehiagotan saiatu arren, ez zutela Zezilia berehalakoan hiltzea lortu, eta martirioak iraun bitartean, kantari aritu zela.

Santa Zeziliaren inguruan ezer ziurrik ez dago. Benetan Zeziliarik izan zen ere ez dago argi. Bestalde, musikarien, poeten, itsuen eta hainbat herritako patroi bada ere, horiekin lotura zuzenik ba ote dagoen ere inork ez daki. Musikarien patroi bihurtzea Erdi Aroko kontua dela dirudi. Orduz geroztik, Santa Zeziliaren irudiak sarri musika tresna batekin lotuta agertu dira.

Kondairak kondaira, zer ospatu badela gaurkoan. Zoriondu inguruko musikariak, eta gozatu egun hauetan eskaintzen diren mota guztietako kontzertuekin!

Zorionak zuri ere!

• bide batez, Zorionak Amatxo! gaurkoan... hainbat urte betetzen ditu eta!

Erromeria gaur Donostian

Gaur arratsaldeko 18:30ean Erromeria izango da Donostiako Konstituzio Plazan, Bagera, Donostiako Euskaltzaleen Elkarteak antolaturik. Donostiako Udaleko Txistulari Taldeak jarriko du musika, Hernaniko Dultzaineroak taldeak lagunduta.

Fernando Ruiz izango da emanaldiaren aurkezle eta dantza eragilea, beraz, edonor gerturatu daiteke gorputza astintzera, oholtza gainetik erakutsiko baitituzte dantzarako pausuak.

Mota guztietako dantzak joko dira: polkak, baltsak, kontradantzak, kalejirak, fandango eta arin-arinak, jolas-dantzak, jotak... Beraz, aitzakiarik ez dago, bertaratu eta musikaren erritmora mugitzeko.

Ibon Koteronen "Alboka 2.1" kontzertua Galdakaon

Ibon Koteron albokariak Alboka 2.1 bere azken lanaren inguruko kontzertua eskainiko du gaur 21:00etan Galdakaoko Iturrondo plazan.

Emanaldi hau Galdakaoko Andra Mari dantza taldearen 55. urteurrenaren barruan antolaturiko egitarauaren parte da.Gaur hasi, eta azaroaren 28ra bitartean hainbat ekitaldi eta kontzertu antolatu dituzte urteurrena ospatzeko asmoz.

Programa osorik ikusteko, egin klik hemen.

Handik Hona podcastaren saio berria

Multimedia Komunikazioa masterrean egiten ari garen lan batzuen artean Handik Hona bidaia podcasta jarri dugu martxan gelakideok.
Podcast honen bitartez, Euskal Herriko hainbat txoko ezagutzera gonbidatu nahi zaituztegu. Kasu honetan, hementxe entzungai duzuena, Leireko Monasteriora eginiko bisita da.



Handik Hona podcastaren saio gehiago entzuteko, egin klik hemen!

Argia.com: Twitter komunikazioan izaten ari den eraginaz, etzi Eibarren

Informazioa: www.argia.com
CodeSyntax enpresaren 10. urteurrenaren harira, Twitter komunikazioan izaten ari den eraginaren inguruko jardunaldia egingo da etzi Eibarren (Gipuzkoa), CodeSyntax-en egoitzan (Azitaingo Industrialdean). Joxe Aranzabalek (Huhezi) hedabide molde berriak izango ditu hizpide, Iban Arantzabalek (Goiena) Twitter, eta Luistxo Fernandezek Umap proiektua aurkeztuko du.

Inauteriak hizpide Oiartzunen

Hil honen 27an eta 28an inauterien inguruan hitz egiteko mahai ingurua antolatu du Oiartzungo Herri Musikaren Txokoak.

Inauterietan festa giroa izaten da nagusi, baina hainbat kulturetan ospatzen den jai honek duen zentzu sinbolikoaz gain, zentzu soziala aztertuko da. Antropologia eta folklorea izango dira abiapuntu, eta kazetaritza eta ikuskizunaren munduen artean dauden arloetan inauterien inguruko ikerketetan egindako hutsak ere aztertuko dira.

Horrez gain, hainbat herritan inauterietan plazaratzen diren dantza eta musikak ikusi eta entzuteko aukera izango da.

Jardunaldi hauetan parte hartu nahi izanez gero, hilaren 25a baino lehen izena eman behar da.

EGITARAUA

Ttakun Ttan Ttakun larunbatean Kursaalen

Juan Mari Beltran musikari eta ikertzailearen emanaldia izango da larunbat honetan Donostiako Kursaalen. Ttakun Ttan Ttakun, txalapartaren inguruko lana plazaratuko du bertan. Txalapartari buruzko liburua, cd-a eta dvd-a argitaratu zituen lehengo urtean Ttakun Ttan Ttakun proiektuaren barruan, eta orain, emanaldiz emanaldi, txoko batetik bestera zabaltzen ari da.

 Larunbatean 20:00etan Kursaalen eskainiko duen kontzertuan, txalapartaren hotsen bidez bidaiatzera gonbidatuko gaitu, Mireia Gabilondoren zuzendaritzapean eta Jon Maiaren koreografiekin lagunduta. Sarrerak servikutxa bidez eros daitezke dagoeneko.

Aurrerapen txiki bat:

Zer iradokitzen dizu zuri?

Multimedia Komunikazioa Masterrean egiten ari garen ariketa batzuen harira, hotsen bidez istorio bat kontatzen saiatu gara. Hemen duzue entzungai TILA taldearen lana.
Animatu eta azaldu iruzkin baten bidez ulertu duzuna!

Gazteak eta sagardotegia

Nazioarteko Trikitixa Jaialdia

Euskal Herriko Trikitixa Elkarteak bederatzigarren aldiz antolatu du Nazioarteko Trikitixa Jaialdia. Euskal soinu jotzaileak entzuteko parada izango da bertan, baina horiez gain, Bretainiatik, Italiatik eta Kataluniatik etorriko trikitilariak ere ariko dira.

Urteroko ohiturei jarraituz, Euskal Herriko hiru ordezkari eta atzerriko beste hiru ariko dira soinua jotzen, bi edo hiru lagunetako talde txikietan. Horrela, atzerrian jotzen diren doinuak ezagutu eta erakutsi nahi dituzte, eta bestalde, bertakoak ere zabaltzea lortu nahi dute.

Bi emanaldi eskainiko dira Jaialdiaren barruan. Bata bihar, Tolosako Leidor antzokian izango da, 22:00etan. Bigarrena berriz larunbatean, Getxoko Andres Isasi musika eskolan, 22:00etan baita ere. Dagoeneko sarrerak salgai daude Kutxaren lehiatilaren bidez, eta emanaldi bakoitzeko lehiatilan ere salgai jarriko dira kontzertua baino ordubete lehenago.

Irakurri berri osoa:

• Berrian
• Noticias de Gipuzkoan

Ardiki Eguna Zaldibian

Atzo bertan hasi ziren Zaldibian urtero ospatzen den Ardiki Egunaren inguruko lehen ekitaldiak. Atzokoan, Joxe Garmendia agerian liburua aurkeztu zen; Joxe Garmendia apaiz zaldibiarraren omenezko liburua, hain zuzen. Besteak beste, Juan Ignazio Iztueta dantzari zaldibiarrari buruzko lanak idatzi zituen Garmendiak.

Gaurkoan, 19:00etan, Juan Antonio Urbeltzek Goierriko dantzei buruzko hitzaldia eskainiko du kultru etxean. Bihar berriz, mendiko ardi gaztaren proiektu pilotoari buruzko hitzaldia eskainiko da 19:30ean kultur etxean.

Egun handiena ordea, igandean ospatuko da. 10:30ean, herriko txistulariek, Juan Mari Beltranek, Astiazaran aita-alabakek, eta Hernaniko Musika Eskolako albokari, dultzainari eta txistulariek diana joko dute eta goiz osoan zehar ariko dira kaleak girotzen. Bestalde, artisautza eta ganadu erakusketa, eta azoka irekiko dira. Eguerdiko 12:00ean berriz, mondeju eta Aralarko gazta lehiaketak hasiko dira herriko plazan eta bitartean, Egaña eta Lizaso bertsotan ariko dira. Sari banaketa 13:30ean egingo da, eta 14:30ean ardikia bazkaltzeko aukera izango da herriko jatetxeetan.
Arratsaldean, Zaldibia eta Amezketako taldeen arteko herri-kirol saioa izango da 17:00ean. Egunari berriz ere giro onean amaiera emateko, kalejira izango da 19:30ean.

Parakaidismo Multimedia ikastaroa

Mikel Reparaz, ETBko albistegietako nazioarteko arloko burua izan dugu gaur Leioako Unibertsitatean, Multimedia Komunikazioa Masterraren barruan Parakaidismo Multimedia ikastaroa emateko. Horrez gain, skype-n bidez, Beijinen eta Parisen ETBko korrespontsal gisa lan egiten duten Olatz Simonekin eta Xabier Madariagarekin hitz egiteko aukera izan dugu.  
Mikel Reparaz kazetaritzaren joera berriez, parakaidistaren lanaz eta jarraitu beharreko pausuez jardun da, baina lehenago, kontzeptu batzuk azaldu dizkigu:

• Parakaidismoa: kazetari bat, bidali berezi bat, albistea dagoen lekura airetik bezala erortzen denean eta landu behar duen gai hori jarraitzen edo ezagutzen ez duenean.
• Korrespontsalak: nahiko territorialak dira. Erredakziotik bidali berezi bezala datozen kazetariak "intruso" gisa har ditzakete, beren lurraldean sartzen direlako. Hau da, beraiek denboraldi luze batean zehar jarraitzen duten gaia bi egunetan landu, kronika batzuk egin eta albistegiko "izar" bihurtzen direlako.
• POPE printzipioa: "Produce Once, Publish Everywhere" = "Behin ekoiztu eta ahal duzun toki guztietara zabaldu". Komunikazio enpresek asmatutako printzipioa da. Dagoeneko ez da geratzen euskarri bakarrerako lan egiten duen kazetaririk. Lehen, kazetariak jorratzen zuen informazio ozeanoak 5 zm-tako sakontasuna zuen. Orain berriz, ozeano hori zabaldu egin da, euskarri gehiagotarako lantzen da, baina sakontasun hori murriztu egin da, kalitatea jeitsi.

Mikel Reparaz Leioan, ikastaroa ematen.

Kazetaritzaren joera berrien artean, hauek nabarmendu ditu Reparazek:

• Wikileaks: kazeritza joera berriena da. Filtrazioetan oinarritutako kazetaritza da, interpretaziorik gabe eskaintze den informazioa. Adibidez, Iraki buruz Pentagonotik bertatik iristen diren filtrazioak.
• Embedded kazetaritza: albistea alderdi batetik jarraitzen denean. Adibidez, Irakeko gerran AEBtako soldaduen ikuspegia azaltzea. Kasu hauetan estetika bilatzen da eta multimedia erreportajearen laborategia izan da.
• Beste formato berri batzuk, Cuatro telebista katean emititzen den Callejeros edo Jon Sistiagak zuzentzen duen REC programa bezalakoak. Espainian modan dauden formatoak dira, sensazionalismo puntua duena. Audientzien mende dagoen showak dira, reallityen eta erreportajegintzaren arteko hibridoak.
• Kazetaritza soziala, blogak edo sare sozialak kasu.
• Hoteleko kazetaritza: sahiestu beharreko kazetaritza da, baina hala ere, askotan geratzen da, gerra edo tentsio handiko kasuetan batez ere, kazetariak, Internet eta telebistaz baliatuz, hoteleko gelatik irten gabe informatzea.

Kazetaritzaren joera berri horiek eta modan dagoen POPE printzipioak argi uzten dute gaur egun kazetari multimedia izateak duen garrantzia. Ezinbestekoa bihurtu denez, ia derrigorrez egungo kazetariak multimedia kazetaritza egiten du. Hau da, kazetariak informazioa behin ekoitzi, eta ondoren, hainbat euskarrietara zabaldu behar du.

Olatz Simon, Beijinetik hizketan.

Beijinetik hitz egin digu Olatz Simon ETBko korrespontsalak, eta bi ideia utzi ditu argi kazetariaren eta multimediaren inguruan. Batetik, kazetari izateko, eta korrespontsal gisa lan egiteko beharrezkoa dena gertatzen dena ezagutzeko, jakiteko eta analizatzeko grina izatea dela. Bestetik, egungo kazetaritzaren erronka zein den adierazi du: multimediak ematen dituen zabaltzeko aukera horiek aprobetxatzea, kalitatea jeitsi gabe.

Xabier Madariaga, Pariseko ETBko bulegoan.

Xabier Madariaga Parisen dago ETBko korrespontsal gisa. Multimediak gauza asko kontatzeko aukera ematen duela nabarmendu du, eta euskarri bakoitzak bere berezitasuna duela: "multimedia ez dugu ikusi behar komunikabideek hartu duten bide txar bezala, baizik eta bide aberasgarri bezala, euskarri bakoitzak ematen dituen aukerak aprobetxatuz".

Hasi da Hernanin Domingeroen denboraldia

Pasa den igandean, hilak 24, Domingeroen denboraldiari hasiera ofiziala eman zitzaion Hernanin. Urtero bezala, aurten ere jende andana espero da herrian, iganderoko poteo eta parrandetan. Inguruko eta ez hain inguruko jendeak lepo beteko ditu Hernaniko taberna eta txoko guztiak, parranda zale amorratuena nor den erakutsi nahian.

Hala ere, Domingerorik handiena, urtero bezala, Hernanin bertan izendatu da. Denboraldiari hasiera ofiziala emateko, igandean egin zen ospakizun garrantzitsuena. Aurtengoan, Apo, 23 urteko hernaniarra, izan da "Habemus Domingerus" titulu berezia jaso duena, lehengo urteko denboraldiko poteatzailerik handienaren postua lortuta. Lehenengo Agurra dantzatu zitzaion, eta ondoren, tituluarekin batera, banda, Txirrisklas kopa handi bat eta sonbrila bat jaso zituen opari "Habemus Domingerus" berriak. Denboraldia ofizialki hasteko zinta mozteko ohorea ere berea izan zen.

"Habemus Domingerus" denboraldiari hasiera ematen.

 Titulu eta opari banaketaren ondoren, ekitaldia girotzeko OiDekOi! talde hernaniarren kontzertuaz gozatzeko aukera izan zen.

OiDekOi!

Txistua, atabala eta pianoa inprobisazioan

Sabin Bikandi txistularia, Asier García atabalaria eta Jerónimo Martín pianistaren kontzertu paregabeaz gozatzeko aukera izan zen bart Bilboko Euskalduna Jauregian. Bilboko Udal Txistulari Bandak prestatutako kontzertu denboraldiaren barruan antolaturiko emanaldia izan zen atzokoa, kasu honetan, inprobisazioaren arloan.

Argazkia: GARA

Ohikoa ez izan arren, txistua, atabala eta pianoa bat-bateko musika jotzen entzun ahal izan ziren. Hau da, musika oinarririk gabe bat-batean sortutako melodiak jo zituzten. Estilo hau araurik ezak deskribatzen du hain zuzen. Jeronimo Martínek berak azaltzen duenez, musika korronte hau "momentuan eta taldean sortzeko desirak eragindakoa da".

Bai Martínek eta baita Bikandik ere eskaini dituzte estilo honetako kontzertuak lehenago, dela elkarrekin edota beste musikari batzuekin. Gainera, Bikandik berak John Tilbury pianista britainiarrarekin inprobisazioa jorratu zuen 2006an.

Aipaturiko Bilboko Udal Txistulari Bandak antolaturiko kontzertu denboraldiko hurrengo emanaldia azaroaren 8an izango da, Aitor Amilibia txistulariaren eta Jose Antonio Hontoria akordeoi-jolearen eskutik.

Blogen arteko azterketa

Zibermedioen arteko analisiarekin jarraituz, blog batzuen arteko konparaketa eta azterketa da ondorengoa. Kasu honetan, Berria.info domeinuaren barruan argitaratzen diren bost blog izan ditut kontuan: Pello Zabalaren "Mendiko Behatokia”, Asier Azpilikuetaren “Ergeletan Ergelenak”, Juanma Sarasolaren “Urruneko Begirada”, Gorka Erostarberen “Gramofonoa” eta azkenik, “Begia”; Lorea Agirre, Jon Benito, Gotzon Hermosilla, Maialen Lujanbia, Garbiñe Ubeda eta Xabier Gantzarainen artean idatzia.

Esan bezala, blog guztiak Berria.info domeinuarenak dira, eta ondorioz, formatu bera jarraitzen dute. Guztiek azaltzen dute modu labur batean blogean zeri buruz idatziko den. Artxibo gisa balio duen egutegi bat ere badute, edozein egunetan argitaratutako posta modu errazean aurkitzea ahalbidetzen duena. Etiketak eta etiketa zerrenda ere erabiltzen dituzte guztiek, gai bera jorratzen duten post guztiak zerrendatu eta irakurri ahal izateko. Horrez gain, bi bilatzaile agertzen dira blog guztietan, oso erabilgarriak iruditu zaizkidanak. Alde batetik, blogean bertan bilaketa egin daiteke, eta bestalde, Berria.info-ko hemerotekan beste bilaketa bat egin daiteke.

Post bakoitzari dagokionez, guztietan agertzen dira sarrera horren izenburua, argitaratutako data eta hitz kopurua. Taldeko blogaren kasuan gainera (Begia-n), testua nork idatzi duen ere agertzen da.

Irakurleari dagokionez ordea, ez zaio aukera askorik ematen. Blog guztietan eskaintzen zaio iruzkin bat egitea, eta bloga bera RSS jario bidez jarrai daiteke. Hortik aurrera, txikia da irakurlearen parte-hartzea. Ezin du blogeko postik gorde edota zabaldu. Ez dago botoa emateko aukerarik ere, eta ez da inon jasotzen zein den testu irakurriena edota iruzkin gehien jaso dituena ere.

Horrez gain, nire ustez, blog guztietan errepikatzen den akatsik handiena eduki multimedien erabilera eskasa edo eza da. Kasu batzuetan ez da ez hipertesturik, ez eta argazki, bideo edota audiorik agertzen. Horrek, irakurle kopuruan eragina izan dezakeela uste dut. Izan ere, irakurle kopurua hauek utzitako iruzkin kopuruari begira kontatzen badugu, “Begia” blog-a da gutxien dituena, eta era berean, hau da eduki multimediak apenas erabiltzen dituen blogetako bat. Aldiz, Asier Azpilikuetaren “Ergeletan Ergelenak” bloga da argazki eta hipertestuez gain, bideoak dituen bakarra, eta baita irakurle gehien dituen bloga ere. Pello Zabalaren “Mendiko Behatokia”n ordea, nahiko irakurle dago, nahiz eta eduki multimediarik batere ez erabili. Kasu honetan, idazlearen maiztasunak garrantzia duela esango nuke, blog hau baita gehien eguneratzen dena. Azkenik, nahiz eta dagoeneko egunerokotasunik ez izan (azken posta: 2009-03-24), aipagarria iruditu zait Gorka Erostarberen “Gramofonoa” blogean audiorik edota bideorik ez erabiltzea, musikaren inguruan idatzi zuela kontuan hartuta.

Errioxarrak eta hernaniarrak izan ziren Herri Musikaren Txokoan

Oiartzungo Herri Musikaren Txokoan antolatzen diren emanaldien zikloaren barruan, errioxarren eta hernaniarren kontzertuarekin gozatzeko aukera izan zen pasa den larunbatean, urriaren 9an. Juan Mari Beltranek aurkezpena egin ostean, Errioxatik etorritako hirukoteak eskaini zuen lehenik kontzertua. Errioxako bertako tradizioari lotutako koplak eta baladak izan ziren batik bat entzungai, herri soinu tresnek lagunduta. Pandero mota desberdinak, gitarraren familiako hainbat instrumentu eta armonika erabili zituzten, besteak beste. Umore ukitu bat ere eman zioten arratsaldeari, perkusio gisa erabili zuten txotxongilo batekin.



Errioxarrek amaituta, Hernaniko Musika Eskolako taldeak hartu zuen txanda. Dultzaina eta tanborra, alboka, txistua, xirula, biolina, akordeoia eta perkusioa izan ziren entzungai hernaniarren eskutik. Nafarroako dultzaina-joleen doinuekin jarri zuen taldeak hasierako alaitasuna, eta txistua eta silbotearekin goxatu zuten segidan giroa. Ondoren, alboka doinu ezagun batzuk izan ziren entzungai, akordeoiarekin lagunduta. Amaitzeko berriz, soinu-tresna guztiak tartekatu zituzten abesti dantzagarri batzuk eskaintzeko. "Propinarik" ere ez zen falta izan, eta kasu honetan, Gipuzkoako errepertoriotik hartutako kantuak joaz, dultzaina hotsekin bete zuten aretoa.



Arratsaldeari amaiera ona emateko, gerturatutako guztiek Herri Musikaren Txokoan bertan afaltzeko parada izan zuten, eta afalostean, kanturako eta dantzarako doinuekin gozatu zuten bertaratutako guztiek.

• Argazki gehiago:
• Errioxako taldea
• Hernaniko taldea

Zibermedioen arteko azterketa

Euskal Herriko, Espainiar Estatuko eta nazioarteko zibermedioen arteko azterketa edo analisi bat egiteko, Berria.info, ElPaís.com eta TheGuardian.co.uk aukeratu ditut. Aanlisi honen ondorioak hiru esparrutan banatu ditut: zibermedio bakoitzak erabiltzaileei ematen dien garrantzia, albisteei emandako tratua, eta zibermedioarekin kontaktazeko eskaintzen dituzten informazio eta aukerak.

Dudarik gabe, erabiltzaileari garrantzia handiena ematen dion zibermedioa El País da. Zuzenean parte hartzera bultzatzen duen linka eskaintzen du, eta erabiltzaileak milaka aukera ditu: blog-a sor dezake, albisteak idatzi eta argitara ditzake, argazki eta bideoak bidal ditzake, bideotxat batean parte har dezake, albisteen gaineko iritziak eman ditzake, aldeko eta kontrako botua eman dezake... Gainera, edukiak argitaratzeko erregistratzeko eskatzen zaio, baina ez bideotxatean, foroetan eta iritzia emateko lekuetan.

Berrian ere erabiltzaileak bideotxatetan, foroetan, lehiaketetan eta albisteak komentatzen parte har dezake, "parte hartu" sekzioari esker. Albisteak ere bidal ditzake, baina ez argazki eta bideoak. El País-ek ez bezala ordea, erabiltzaileak erregistratua egon behar du orokorrean. 
The Guardian-en kasuan berriz, guztia nahasgarri xamarra da. Badirudi, albisteen sekzioari garrantzia ematen diotela, eta hor, erabiltzaileak ezin du ezer egin. Baina "kultura", "kirola", "telebista", "bloga", "komentatu" eta gisa horretako sekzioetan iritzia eman daitekela dirudi, beti erregistratuta. Albisteak, argazkiak eta bideoak ere bidal ditzake, baina ez dago argi gero non agertuko diren; ez dago zuzenean erabiltzaileek bidalitako edukia duen sekziorik.

Albisteei dagokienean, berriro ere, El País da aukera gehien ematen dituena. Botoa eman, komentatu, inprimitu edota zabaldu egin daitezke. Berria-k ez du albistea komentatzeko aukera ematen, eta The Guardian.-ek "albisteak" sekzioan ere ez du aukera ematen. Tipografia handitzeko eta txikitzeko aukera ere ematen dio erabiltzaileari. Hau Berrian eta The Guardian-en ere ematen da. Bestalde, zabaltzeko deigarria da guztiek dutela twitter-era edo facebook-era lotzeko aukera, beste aplikazio batzuen artean. Halaber, hiru zibermedioetan agertzen da albisteak bilatzeko bilatzaileren bat, edota irakurriena edo botatuena zein den erakusten duen ranking-a.

Kontakturako informazioari dagokionez, hiru zibermedioek eskaintzen dute zibermedioko erredakzioaren helbide elektronikoa, posta helbidea edota telefonoa. Baina berriz ere, El País da aukera zabalena duena. Hiru zibermedioak jarrai daitezke feed-en bitartez, baina El País da feed horiek sekzioetan sailkatzeko aukera ematen duen bakarra. 

Beraz, orokorrean, argi ikusten da El País dela aukera gehien ematen dituen zibermedioa eta momentu oro erabiltzailea kontuan hartzen duena.

Albokarekin plazaz plaza

Urriaren 24 eta 25ean ospatu zen Hernanin Euskal Herriko alboka topaketa. Aurtengoa, 17.a izan da. Bilbotik, Gasteiztik eta Iruñeatik etorri ziren hainbat albokari Hernaniko kaleak animatzera. 
Ostiralean eman zitzaion hasiera topaketari, talde bizkaitar batek eskainitako kontzertu batekin. Larunbata goizean berriz, alboka eta panderoa uztartu zituen tailer bat eman zuten Ibon Koteron eta Asier Elorriagak. Arratsaldean, eguraldiak lagundu ez bazuen ere, Euskal Herriko txoko ezberdinetatik etorritako albokariek beren trebeziaren erakustaldi bat egin zuten, eta ondoren, Hernaniko kaleak albokaren doinuaren bustiz, giro eder eta alaiean eman zioten amaiera aurtengo topaketari.

Musikaren txokoa, ere bai

Masterreko kontuez gain, hemen musikaz idatziko dut

Martxan twitter-a

Hasi dugu masterra, eta hasi gara multimedia munduan barneratzen. Internet-en "sartu" esaten nuen nik lehenago, baina karreran zehar irakasle batek Internet-era "irten" egiten garela esan zigun. Hala ba, mundu berri honetara irten naiz, baina ez egunero kalera irteten naizen segurtasun berarekin, ordea!

Oraingoan twitter-en nabil buru-belarri. Ireki dut kontua. Hainbat twitter-erabiltzaileren jarraitzaile egin naiz, eta nik ere lortu ditut jarraitzaile bakan batzuk. Albiste batzuen berri twitter-aren bitartez izateko aukera izan dut. Hala ere, mila txikikeria daude ulertzen ez ditudanak...

Zergatik mezu batzuetan # delakoa agertzen da? Zer da hori? Talde baten partaideek gai horren inguruan zerbait aipatzean agertzen den ikurra?
Eta nik mezu bat idazten dudanean non agertzen da hori? Nire jarraitzaie direnen orrialdean? Hala nire jarraitzaileek jarraitzen dituzten orrialdeetan? Azken batean, mezu guztiak ez dira "profesionalak" eta nork bere egoera komentatzen du batzuetan... Ai ama! Ez al da errazagoa aurrez-aurreko elkarrizketa???

Lehen egunak

Katxibatxe multimediak

Noizbait kazetari bihurtuko ginelakoan hasi genituen unibertsitateko ikasketak. Baina hara non, masterrean esan diguten kazetariak, bere horretan, ez duela etorkizunik! Kazetari komunikatzailea desagertu egingo dela, alegia! Errobotek lekua kenduko digute.
Zer egingo diogu ba. Hemendik aurrera, niretzat berria den, eta etengabe aldatzen ari den multimedia mundu honen baitan gure lekutxoa egiten saiatu beharko dugu. Dagoeneko sortu dut blog-a, eta irekiak ditut kontuak facebook-en edota twitter-en. Delicious erabiltzen ere hasi behar omen dugu. Eta Google groups-en bitartez elkarren artean komunikatzen... Horrenbeste algoritmoren artean ez galtzea espero dut.
Eskerrak, gutxienez, idazmakinaren letra iturria erabiltzeko aukera badugun, mundua jango genueneko garaia gogora ekarri ahal izateko!